ਗੁੜਗਾਓਂ: ਹਿੰਦੂਤਵੀ ਸੰਗਠਨਾਂ ਦੇ ਵਿਰੋਧ ਤੋਂ ਬਾਅਦ ਅੱਠ ਥਾਵਾਂ ‘ਤੇ ਨਮਾਜ਼ ਅਦਾ ਕਰਨ ਦੀ ਆਗਿਆ ਰੱਦ

ਨਵੀਂ ਦਿੱਲੀ: ਹਿੰਦੂਤਵੀ ਸੰਗਠਨਾਂ ਦੇ ਦਬਾਅ ਕਾਰਨ, ਗੁੜਗਾਓਂ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਮੰਗਲਵਾਰ ਨੂੰ 37 ਨਿਰਧਾਰਤ ਸਥਾਨਾਂ ਵਿੱਚੋਂ ਅੱਠ ‘ਤੇ ਨਮਾਜ਼ ਅਦਾ ਕਰਨ ਦੀ ਇਜਾਜ਼ਤ ਰੱਦ ਕਰ ਦਿੱਤੀ।

‘ਇੰਡੀਅਨ ਐਕਸਪ੍ਰੈਸ’ ਦੀ ਰਿਪੋਰਟ ਅਨੁਸਾਰ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਪ੍ਰਸ਼ਾਸਨ ਨੇ ਸਥਾਨਕ ਨਿਵਾਸੀਆਂ ਅਤੇ ਰੈਜ਼ੀਡੈਂਟ ਵੈਲਫੇਅਰ ਐਸੋਸੀਏਸ਼ਨ ਦੇ ਇਤਰਾਜ਼ ਦਾ ਹਵਾਲਾ ਦਿੰਦੇ ਹੋਏ ਇਹ ਫੈਸਲਾ ਲਿਆ ਹੈ।

ਇਹ ਫੈਸਲਾ ਹਿੰਦੂਤਵੀ ਸੰਗਠਨਾਂ ਦੇ ਵਿਰੋਧ ਤੋਂ ਬਾਅਦ ਆਇਆ ਹੈ। ਹਿੰਦੂਤਵੀ ਸੰਗਠਨਾਂ ਨੇ ਪ੍ਰਸ਼ਾਸਨ ਦੀ ਮਨਜ਼ੂਰੀ ਦੇ ਬਾਵਜੂਦ ਖੁੱਲ੍ਹੇ ‘ਚ ਨਮਾਜ਼ ਅਦਾ ਕਰਨ ਦਾ ਵਿਰੋਧ ਕੀਤਾ ਸੀ, ਜਿਸ ਤੋਂ ਬਾਅਦ ਪ੍ਰਸ਼ਾਸਨ ਨੂੰ ਇਨ੍ਹਾਂ ਨਿਰਧਾਰਤ ਥਾਵਾਂ ‘ਤੇ ਪੁਲਸ ਸੁਰੱਖਿਆ ਮੁਹੱਈਆ ਕਰਵਾਉਣ ਲਈ ਮਜਬੂਰ ਹੋਣਾ ਪਿਆ।

ਜਿਨ੍ਹਾਂ ਥਾਵਾਂ ‘ਤੇ ਖੁੱਲ੍ਹੇ ‘ਚ ਨਮਾਜ਼ ਅਦਾ ਕਰਨ ਦੀ ਇਜਾਜ਼ਤ ਰੱਦ ਕੀਤੀ ਗਈ ਸੀ, ਉਨ੍ਹਾਂ ‘ਚ ਬੰਗਾਲੀ ਬਸਤੀ ਸੈਕਟਰ-49, ਵੀ ਬਲਾਕ ਡੀ.ਐੱਲ.ਐੱਫ. ਫੇਜ਼ 3, ਸੂਰਤ ਨਗਰ ਫੇਜ਼-1, ਖੇੜੀ ਮਾਜਰਾ ਪਿੰਡ ਦੇ ਬਾਹਰ, ਦਵਾਰਕਾ ਐਕਸਪ੍ਰੈਸ ਵੇਅ ‘ਤੇ ਪਿੰਡ ਦੌਲਤਾਬਾਦ ਨੇੜੇ, ਰਾਮਗੜ੍ਹ ਪਿੰਡ ਦੇ ਨਜ਼ਦੀਕੀ ਰਸਤੇ ਸ਼ਾਮਲ ਹਨ | ਸੈਕਟਰ-68, ਡੀਐਲਐਫ ਸਕੁਏਅਰ ਟਾਵਰ ਦੇ ਨੇੜੇ, ਰਾਮਪੁਰ ਪਿੰਡ ਤੋਂ ਨਖਰੋਲਾ ਰੋਡ ਤੱਕ ਸ਼ਾਮਲ ਹੈ।

ਹਿੰਦੂਤਵੀ ਜਥੇਬੰਦੀਆਂ ਪਿਛਲੇ ਦੋ ਮਹੀਨਿਆਂ ਤੋਂ ਸੈਕਟਰ-12-ਏ ਅਤੇ ਸੈਕਟਰ-47 ਵਿੱਚ ਖੁੱਲ੍ਹੇਆਮ ਨਮਾਜ਼ਾਂ ਦਾ ਵਿਰੋਧ ਕਰ ਰਹੀਆਂ ਹਨ।

ਹਿੰਦੂਤਵੀ ਜਥੇਬੰਦੀਆਂ ਅਤੇ ਸਥਾਨਕ ਲੋਕਾਂ ਵੱਲੋਂ ਮੁਸਲਮਾਨਾਂ ਵੱਲੋਂ ਖੁੱਲ੍ਹੇ ਵਿੱਚ ਨਮਾਜ਼ ਅਦਾ ਕਰਨ ਦੇ ਵਿਰੋਧ ਤੋਂ ਬਾਅਦ ਪ੍ਰਸ਼ਾਸਨ ਵੱਲੋਂ ਇਨ੍ਹਾਂ 37 ਥਾਵਾਂ ਦੀ ਨਿਸ਼ਾਨਦੇਹੀ ਕੀਤੀ ਗਈ ਸੀ। ਪ੍ਰਸ਼ਾਸਨ ਨੇ ਨਮਾਜ਼ ਅਦਾ ਕਰਨ ਵਾਲੀਆਂ ਥਾਵਾਂ ਦੀ ਪਛਾਣ ਕਰਨ ਲਈ ਇਕ ਵਾਰ ਫਿਰ ਕਮੇਟੀ ਦਾ ਗਠਨ ਕੀਤਾ ਹੈ।

ਉਪ ਮੰਡਲ ਮੈਜਿਸਟ੍ਰੇਟ, ਸਹਾਇਕ ਕਮਿਸ਼ਨਰ ਰੈਂਕ ਦੇ ਪੁਲਿਸ ਅਧਿਕਾਰੀ, ਹਿੰਦੂ ਅਤੇ ਮੁਸਲਿਮ ਭਾਈਚਾਰਿਆਂ ਦੇ ਮੈਂਬਰ ਅਤੇ ਸਮਾਜਿਕ ਜਥੇਬੰਦੀਆਂ ਇਸ ਕਮੇਟੀ ਦੇ ਮੈਂਬਰ ਹੋਣਗੇ।

ਬਿਆਨ ਵਿੱਚ ਕਿਹਾ ਗਿਆ ਹੈ, “ਸਮੇਟੀ ਸਾਰੇ ਹਿੱਸੇਦਾਰਾਂ ਨਾਲ ਵਿਚਾਰ ਵਟਾਂਦਰੇ ਤੋਂ ਬਾਅਦ ਫੈਸਲਾ ਲਵੇਗੀ ਅਤੇ ਨਮਾਜ਼ ਲਈ ਸਥਾਨ ਨਿਰਧਾਰਤ ਕਰਨ ਦਾ ਫੈਸਲਾ ਸਥਾਨਕ ਲੋਕਾਂ ਦੀ ਸਹਿਮਤੀ ਤੋਂ ਬਾਅਦ ਲਿਆ ਜਾਵੇਗਾ।” ਫੈਸਲਾ ਲੈਂਦੇ ਸਮੇਂ ਇਹ ਯਕੀਨੀ ਬਣਾਇਆ ਜਾਵੇਗਾ ਕਿ ਇਲਾਕੇ ਦੇ ਨਾਗਰਿਕਾਂ ਨੂੰ ਕਿਸੇ ਖਾਸ ਜਗ੍ਹਾ ‘ਤੇ ਨਮਾਜ਼ ਅਦਾ ਕਰਨ ‘ਚ ਕੋਈ ਇਤਰਾਜ਼ ਨਾ ਹੋਵੇ। ਨਮਾਜ਼ ਕਿਸੇ ਵੀ ਮਸਜਿਦ, ਈਦਗਾਹ ਜਾਂ ਨਿੱਜੀ ਸਥਾਨ ‘ਤੇ ਅਦਾ ਕੀਤੀ ਜਾ ਸਕਦੀ ਹੈ।

29 ਅਕਤੂਬਰ ਨੂੰ ਗੁੜਗਾਓਂ ‘ਚ ਨਮਾਜ਼ ‘ਚ ਵਿਘਨ ਪਾਉਣ ਦੀ ਕੋਸ਼ਿਸ਼ ਕਰਨ ‘ਤੇ 30 ਲੋਕਾਂ ਨੂੰ ਹਿਰਾਸਤ ‘ਚ ਲਿਆ ਗਿਆ ਸੀ। ਇਹ ਲੋਕ ਨਾਅਰੇਬਾਜ਼ੀ ਕਰ ਰਹੇ ਸਨ ਅਤੇ ਉਨ੍ਹਾਂ ਦੇ ਹੱਥਾਂ ਵਿੱਚ ਰੋਸ ਦੇ ਤਖ਼ਤੇ ਸਨ।

ਦ ਵਾਇਰ ਨੇ ਇਸ ਤੋਂ ਪਹਿਲਾਂ ਆਪਣੀ ਰਿਪੋਰਟ ਵਿਚ ਦੱਸਿਆ ਸੀ ਕਿ ਹਿੰਦੂਤਵੀ ਆਗੂ ਅਤੇ ਸੰਗਠਨ ਇਨ੍ਹਾਂ ਵਿਰੋਧ ਪ੍ਰਦਰਸ਼ਨਾਂ ਦੇ ਕੇਂਦਰ ਵਿਚ ਰਹੇ ਹਨ ਅਤੇ ਉਨ੍ਹਾਂ ਨੇ ਮੁਸਲਿਮ ਭਾਈਚਾਰੇ ‘ਤੇ ਝੂਠੇ ਦੋਸ਼ ਲਗਾਏ ਹਨ।

ਇਨ੍ਹਾਂ ਪ੍ਰਦਰਸ਼ਨਾਂ ਦੀ ਅਗਵਾਈ ਕਰ ਰਹੇ ਭਾਰਤ ਮਾਤਾ ਵਾਹਿਨੀ ਦੇ ਪ੍ਰਧਾਨ ਦਿਨੇਸ਼ ਭਾਰਤੀ ਨੇ ਦਾਅਵਾ ਕੀਤਾ ਕਿ ਖੁੱਲ੍ਹੇ ਵਿੱਚ ਨਮਾਜ਼ ਅਦਾ ਕਰਨਾ ਇੱਕ ਅੰਤਰਰਾਸ਼ਟਰੀ ਸਾਜ਼ਿਸ਼ ਸੀ।

ਉਸ ਨੇ ਕਿਹਾ ਸੀ, ‘ਇਹ ਲੋਕ ਲਵ ਜੇਹਾਦ ਅਤੇ ਜ਼ਮੀਨੀ ਜੇਹਾਦ ਦੀ ਸਾਜ਼ਿਸ਼ ਤਹਿਤ ਨਮਾਜ਼ ਅਦਾ ਕਰ ਰਹੇ ਹਨ। ਜੇਕਰ ਅਸੀਂ ਆਵਾਜ਼ ਨਹੀਂ ਉਠਾਈ ਤਾਂ ਉਹ ਇੱਥੇ ਮਸਜਿਦ ਬਣਾ ਦੇਣਗੇ।

ਦੱਸਣਯੋਗ ਹੈ ਕਿ ਸਾਲ 2018 ‘ਚ ਗੁੜਗਾਓਂ ‘ਚ ਵੀ ਖੁੱਲ੍ਹੇ ‘ਚ ਨਮਾਜ਼ ਅਦਾ ਕਰਨ ਵਾਲੇ ਮੁਸਲਮਾਨਾਂ ‘ਤੇ ਲਗਾਤਾਰ ਹਮਲੇ ਹੋਏ ਸਨ। ਕੁਝ ਲੋਕਾਂ ਨੇ ਜਨਤਕ ਥਾਵਾਂ ‘ਤੇ ਨਮਾਜ਼ ਅਦਾ ਕਰ ਰਹੇ ਮੁਸਲਮਾਨਾਂ ‘ਤੇ ਹਮਲਾ ਕੀਤਾ ਸੀ ਅਤੇ ਕਥਿਤ ਤੌਰ ‘ਤੇ ਜੈ ਸ਼੍ਰੀ ਰਾਮ ਦਾ ਨਾਅਰਾ ਲਗਾਇਆ ਸੀ।

ਇਸ ਹਮਲੇ ਤੋਂ ਬਾਅਦ ਯਤੀ ਨਰਸਿਮਹਾਨੰਦ ਵਰਗੇ ਹਿੰਦੂਤਵੀ ਨੇਤਾਵਾਂ ਨੇ ਵੀ ਹਰਿਆਣਾ ਦੇ ਮੁਸਲਿਮ ਨੌਜਵਾਨਾਂ ‘ਤੇ ਲੈਂਡ ਜੇਹਾਦ ਦੇ ਦੋਸ਼ ਲਾਏ ਸਨ। ਖੁੱਲੇ ਸਥਾਨਾਂ ‘ਤੇ ਨਮਾਜ਼ ਨੂੰ ਰਾਜ ਦੀ ਮਨਜ਼ੂਰੀ ਦੱਸਦੇ ਹੋਏ, ਨਰਸਿਮਹਾਨੰਦ ਨੇ ਕਿਹਾ ਸੀ, “ਇਹ ਗੁੜਗਾਉਂ ਨੂੰ ਤਬਾਹ ਕਰਨ ਦੀ ਸਾਜ਼ਿਸ਼ ਹੈ ਕਿਉਂਕਿ ਇਹ ਇੱਕ ਨਵਾਂ ਆਰਥਿਕ ਕੇਂਦਰ ਹੈ।”