ਕਰੋਨਾ ਵਾਇਰਸ : ਗੁਜਰਾਤ ਦੇ ਹਸਪਤਾਲ ਵਿਚ ਧਰਮ ਦੇ ਆਧਾਰ ‘ਤੇ ਮਰੀਜ਼ਾਂ ਦੇ ਵੱਖਰੇ ਵੱਖਰੇ ਵਾਰਡ ਬਣਾਏ

ਅਹਿਮਦਾਬਾਦ : ਗੁਜਰਾਤ ਦੇ ਅਹਿਮਦਾਬਾਦ ਸਿਵਲ ਹਸਪਤਾਲ ਵਿਚ ਕਰੋਨਾ ਵਾਇਰਸ ਦੇ ਮਰੀਜ਼ਾਂ ਅਤੇ ਸ਼ੱਕੀਆਂ ਦੇ ਵਾਰਡ ਨੂੰ ਉਨ੍ਹਾਂ ਦੇ ਧਰਮ ਦੇ ਆਧਾਰ ‘ਤੇ ਵੱਖ ਵੱਖ ਬਣਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਸਬੰਧ ਵਿਚ ਹਸਪਤਾਲ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਸਰਕਾਰ ਦੇ ਆਦੇਸ਼ ਮਗਰੋਂ ਅਜਿਹਾ ਕੀਤਾ ਗਿਆ ਹੈ। ਉਧਰ ਸੂਬਾ ਸਰਕਾਰ ਨੇ ਇਸ ਬਾਰੇ ਜਾਣਕਾਰੀ ਹੋਣ ਤੋਂ ਇਨਕਾਰ ਕੀਤਾ ਹੈ।
‘ਇੰਡੀਅਨ ਐਕਸਪ੍ਰੈੱਸ’ ਦੀ ਰਿਪੋਰਟ ਮੁਤਾਬਕ, ਇਸ ਸਬੰਧ ਵਿਚ ਸੂਬੇ ਦੇ ਉਪ ਮੁੱਖ ਮੰਤਰੀ ਅਤੇ ਸਿਹਤ ਮੰਤਰੀ ਨਿਤਿਨ ਪਟੇਲ ਨੇ ਇਸ ਬਾਰੇ ਜਾਣਕਾਰੀ ਹੋਣ ਤੋਂ ਇਨਕਾਰ ਕੀਤਾ। ਉਧਰ ਹਸਪਤਾਲ ਦੇ ਮੈਡੀਕਲ ਅਫ਼ਸਰ ਡਾ. ਗੁਣਵੰਤ ਐਚ ਰਾਠੌੜ ਦਾ ਕਹਿਣਾ ਹੈ ਕਿ ਸੂਬਾ ਸਰਕਾਰ ਦੇ ਨਿਰਦੇਸ਼ ਅਨੁਸਾਰ ਹਿੰਦੂ ਮਰੀਜ਼ਾਂ ਅਤੇ ਮੁਸਲਮਾਨ ਮਰੀਜ਼ਾਂ ਲਈ ਵੱਖ ਵੱਖ ਵਾਰਡ ਬਣਾਏ ਗਏ ਹਨ।
ਡਾ. ਰਾਠੌੜ ਦਾ ਕਹਿਣਾ ਹੈ ਕਿ ਆਮ ਤੌਰ ‘ਤੇ ਪੁਰਸ਼ਾਂ ਅਤੇ ਔਰਤਾਂ ਲਈ ਵੱਖਰੇ ਵੱਖਰੇ ਵਾਰਡ ਹੁੰਦੇ ਹਨ ਪਰ ਇਥੇ ਹਿੰਦੂਆਂ ਅਤੇ ਮੁਸਲਮਾਨਾਂ ਲਈ ਵੱਖਰੇ ਵੱਖਰੇ ਵਾਰਡ ਬਣਾਏ ਗਏ ਹਨ। ਧਰਮ ਦੇ ਆਧਾਰ ‘ਤੇ ਵਾਰਡ ਵੱਖਰੇ ਕਰਨ ਦਾ ਕਾਰਨ ਪੁਛਣ ‘ਤੇ ਰਾਠੌੜ ਨੇ ਕਿਹਾ ਕਿ ਇਹ ਸਰਕਾਰ ਦਾ ਫ਼ੈਸਲਾ ਹੈ ਅਤੇ ਤੁਸੀਂ ਉਨ੍ਹਾਂ ਤੋਂ ਹੀ ਸਵਾਲ ਪੁਛੋਂ।  ਸੂਤਰਾਂ ਅਨੁਸਾਰ ਕਰੋਨਾ ਦੇ 186 ਸ਼ੱਕੀਆਂ ਵਿਚੋਂ 150 ਦੇ ਵਾਇਰਸ ਹੋਣ ਦੀ ਪੁਸ਼ਟੀ ਹੋਈ ਹੈ। ਇਨ੍ਹਾਂ ਵਿਚੋਂ 40 ਮੁਸਲਮਾਨ ਮਰੀਜ਼ ਹਨ।